सुन्दरहरैंचा (मोरङ) : नेपाली कांग्रेसको १५औँ महाधिवेशनअन्तर्गत सुन्दरहरैंचा नगरपालिका–३ को वडा अधिवेशनबाट जीवनप्रसाद ढुङ्गाना वडा सभापतिमा सर्वसम्मत चयन भएका छन्।
वडा अधिवेशनमा सहभागी कांग्रेसका क्रियाशील सदस्य तथा प्रतिनिधिहरूबीच सहमति कायम गर्दै ढुङ्गानालाई वडा सभापतिको जिम्मेवारी प्रदान गरिएको हो। सर्वसम्मत नेतृत्व चयनसँगै वडा नं. ३ मा कांग्रेसको संगठनलाई थप सुदृढ र व्यवस्थित बनाउने अपेक्षा गरिएको छ।
नवनिर्वाचित सभापति ढुङ्गानाले आफूलाई सर्वसम्मत रूपमा जिम्मेवारी प्रदान गर्ने सम्पूर्ण क्रियाशील सदस्य, निर्वाचन मण्डल, पार्टीका नेता–कार्यकर्ता तथा शुभेच्छुकप्रति आभार व्यक्त गरेका छन्। उनले पार्टी संगठनलाई एकताबद्ध बनाउँदै वडास्तरमा कांग्रेसको गतिविधिलाई थप प्रभावकारी बनाउने प्रतिबद्धता व्यक्त गरेका छन्।
उनले वडा तहदेखि नै पार्टी संगठनलाई बलियो बनाउने, क्रियाशील सदस्यबीच समन्वय र सहकार्य बढाउने तथा जनताका समस्या र आवश्यकतालाई पार्टीको प्राथमिकतामा राखेर अघि बढ्ने बताएका छन्।
सुन्दरहरैंचा–३ मा नेतृत्व चयनका क्रममा सहमतिको वातावरण निर्माण हुनु कांग्रेसभित्र संगठनात्मक एकता र सहकार्यको सकारात्मक संकेतका रूपमा हेरिएको छ। वडा अधिवेशनमार्फत नयाँ नेतृत्व चयन भएसँगै आगामी दिनमा संगठन विस्तार, जनसम्पर्क तथा पार्टीका गतिविधिलाई थप गतिशील बनाउने चुनौती र जिम्मेवारी नवनिर्वाचित नेतृत्वमाथि आएको छ।
