सुन्दरहरैंचा । प्रसूति पीडाले छटपटिएकी गर्भवतीलाई बचाउन परिवारले ऋण खोज्दै वीरगञ्ज वा जनकपुरका अस्पतालतर्फ हतारिनुपर्ने बाध्यता अब सर्लाहीको ईश्वरपुरमा धेरै हदसम्म अन्त्य हुने भएको छ। आर्थिक अभावका कारण सुरक्षित मातृत्वको अधिकारबाट वञ्चित हुनुपर्ने गरिब तथा विपन्न परिवारका लागि ईश्वरपुर नगर अस्पतालमा सुरु भएको सिजेरियन (सी–सेक्सन) सेवा आशाको नयाँ किरण बनेको छ।
शुक्रबारदेखि नगर अस्पतालमा सिजेरियन सेवा औपचारिक रूपमा सञ्चालनमा आएपछि अब जटिल प्रसूतिको अवस्थामा स्थानीय महिलाले आफ्नै नगरभित्र विशेषज्ञ चिकित्सकको निगरानीमा सुरक्षित उपचार पाउने भएका छन्। यसले विशेषगरी आर्थिक रूपमा कमजोर परिवारलाई ठूलो राहत पुग्ने विश्वास गरिएको छ।
यसअघि सामान्य प्रसूति सम्भव नभएका महिलालाई सिजेरियनका लागि वीरगञ्ज वा जनकपुरका अस्पताल लैजानुपर्ने अवस्था थियो। उपचार, यातायात, औषधि र बसोबास जोड्दा करिब ५० हजार रुपैयाँ वा त्यसभन्दा बढी खर्च हुने भएकाले धेरै परिवार आर्थिक संकटमा पर्ने गरेका थिए। कतिपयले ऋण काढ्नुपर्ने, त कतिपयले ढिलो उपचारका कारण आमा र शिशुको ज्यानसमेत जोखिममा पार्नुपर्ने पीडादायी अवस्था भोग्दै आएका थिए।
सेवा उद्घाटन कार्यक्रममा बोल्दै ईश्वरपुर नगरपालिकाका नगरप्रमुख मनोज कुमार आचार्यले अब गरिब तथा विपन्न नागरिकले उपचारका लागि वीरगञ्ज र जनकपुर धाउनुपर्ने बाध्यता अन्त्यतर्फ अघि बढेको बताए। उनले नागरिकको स्वास्थ्य सेवामा पहुँच सुनिश्चित गर्नु स्थानीय सरकारको पहिलो दायित्व भएको उल्लेख गर्दै कुनै पनि आमाले आर्थिक अभावकै कारण सुरक्षित प्रसूति सेवाबाट वञ्चित हुन नपरोस् भन्ने उद्देश्यले यो सेवा सञ्चालनमा ल्याइएको बताए।
नगरप्रमुख आचार्यले नगर अस्पताललाई क्रमशः थप सुविधा सम्पन्न बनाउँदै विशेषज्ञ स्वास्थ्य सेवा विस्तार गरिने प्रतिबद्धता पनि व्यक्त गरे। उनका अनुसार स्थानीय नागरिकलाई आफ्नै घरआँगनमा गुणस्तरीय स्वास्थ्य सेवा उपलब्ध गराउनु नै नगरपालिकाको मुख्य लक्ष्य हो।
ईश्वरपुर नगर अस्पतालमा सिजेरियन सेवा सञ्चालनसँगै अब ग्रामीण भेगका गर्भवती महिलाले समयमै उपचार पाउने, अनावश्यक आर्थिक भार कम हुने र सुरक्षित मातृत्व सुनिश्चित गर्न महत्वपूर्ण टेवा पुग्ने अपेक्षा गरिएको छ।
स्थानीयवासीले पनि यसलाई ईश्वरपुरको स्वास्थ्य सेवामा ऐतिहासिक उपलब्धिका रूपमा लिएका छन्। उनीहरूको विश्वास छ—यो सेवा केवल एउटा नयाँ स्वास्थ्य सुविधा होइन, आर्थिक अभावका कारण उपचारबाट वञ्चित हुने सयौं आमाको जीवनमा आशा, भरोसा र सुरक्षित भविष्यको आधार बन्नेछ।
