प्रेक्षा आचार्य
काठमाडौं । विभिन्न देशका महिला नेतृत्वकर्तालाई एउटै मञ्चमा जोड्दै महिला नेतृत्व, सशक्तीकरण र आपसी सञ्जाल विस्तारमा केन्द्रित पहिलो LOLA Asia Leadership Retreat अगस्ट ११ देखि १४ सम्म काठमाडौंमा सम्पन्न भएको छ।
बुढानीलकण्ठस्थित Holiday Inn Resort मा आयोजित चारदिने रिट्रिटमा विभिन्न देशका LOLA च्याप्टर तथा क्षेत्रीय नेतृत्वमा रहेका महिलाहरू सहभागी भएका थिए। कार्यक्रममा नेतृत्व, व्यक्तिगत अनुभव, सांस्कृतिक विविधता, समुदायमा महिलाको भूमिका र आपसी सहकार्यका विषयमा छलफल तथा अन्तरक्रिया गरिएको थियो।
अगस्ट ११ देखि १४ सम्म काठमाडौंमा सम्पन्न रिट्रिटमा LOLA Itahari की च्याप्टर लिड प्रेक्षा आचार्यसहित विभिन्न देशका महिला नेतृत्वकर्ताहरूको सहभागिता रहेको थियो। फरक देश, समुदाय र पृष्ठभूमिबाट आएका सहभागीले आफ्ना नेतृत्व यात्रा, अनुभव तथा समुदायमा गरिरहेका कामबारे एकअर्कासँग विचार आदानप्रदान गरेका थिए।
रिट्रिटका क्रममा व्यक्तिगत कथा तथा अनुभव प्रस्तुत गर्ने सत्रसँगै सांस्कृतिक आदानप्रदान, नेतृत्वसम्बन्धी छलफल र प्रस्तुतीकरणसम्बन्धी गतिविधि सञ्चालन भएका थिए। यस्ता अन्तरक्रियाले सहभागीलाई फरक परिवेशमा महिलाले नेतृत्व गर्दा भोग्ने चुनौती र प्राप्त गर्ने अनुभव बुझ्ने अवसर दिएको थियो।
कार्यक्रमको महत्वपूर्ण पक्ष विभिन्न देशका महिला नेतृत्वकर्ताबीच बनेको सम्बन्ध र सञ्जाल पनि रह्यो। आफ्नै समुदायमा नेतृत्व गरिरहेका महिलाले देशको सीमाभन्दा बाहिरका नेतृत्वकर्तासँग जोडिएर नयाँ विचार, अनुभव र सिकाइ आदानप्रदान गर्ने अवसर पाएका थिए।
रिट्रिटले महिला नेतृत्वलाई व्यक्तिगत क्षमता विकासमा मात्र सीमित नराखी आपसी सम्बन्ध, सहकार्य र सञ्जाल निर्माणसँग जोड्नुपर्ने आवश्यकतामाथि पनि जोड दिएको थियो। फरक पृष्ठभूमिका महिलालाई एउटै मञ्चमा ल्याएर अनुभव साझा गर्ने यस्ता अवसरले महिला नेतृत्वलाई स्थानीय तहदेखि क्षेत्रीय स्तरसम्म थप बलियो बनाउन सहयोग पुग्ने सहभागीहरूको बुझाइ थियो।
महिला सशक्तीकरणका लागि अवसर र नेतृत्व विकाससँगै एकअर्कासँग जोडिने सञ्जाल पनि महत्वपूर्ण हुने सन्देश रिट्रिटले दिएको छ। विभिन्न देशका महिलाबीच बनेका यस्ता सम्बन्धले आगामी दिनमा साझा सिकाइ, सहकार्य र नेतृत्वका नयाँ सम्भावना सिर्जना गर्न सक्ने देखिन्छ।
