योगेन्द्र योगी
सुन्दरहरैंचा(मोरङ) : विनाशकारी भोटेकोशी बाढीबाट प्रभावित परिवारहरूको राहत तथा पुनर्स्थापनाका लागि नेपाल जग्गा तथा आवास विकास महासंघले रियल इस्टेट व्यवसायीहरूसँग सहकार्य गरी संकलन गरेको ३१ लाख रुपैयाँ सहयोग रकम प्रधानमन्त्री दैविक प्रकोप उद्धार कोषमा जम्मा गरिएको छ।
विपद्को कठिन घडीमा बाढीपीडित नागरिकहरूको पीडामा साथ दिने उद्देश्यले महासंघको पहलमा देशभरका रियल इस्टेट व्यवसायी तथा विभिन्न सहयोगी मनहरूबाट उक्त रकम संकलन गरिएको हो। संकलित सहयोग रकम बुधबार एक औपचारिक कार्यक्रमका बीच अर्थमन्त्री स्वर्णिम वाग्लेलाई हस्तान्तरण गरिएको महासंघले जनाएको छ।
नेपाल जग्गा तथा आवास विकास महासंघका अध्यक्ष विष्णु प्रसाद घिमिरे लगायतको टोलीले अर्थमन्त्री वाग्लेलाई भेट गरी बाढीबाट प्रभावित परिवारहरूको राहत, उद्धार तथा पुनर्स्थापनाका लागि संकलन गरिएको रकम हस्तान्तरण गरेको हो।
महासंघले प्राकृतिक विपद्ले ठूलो मानवीय तथा आर्थिक क्षति पुर्याएको कठिन परिस्थितिमा निजी क्षेत्र पनि सामाजिक उत्तरदायित्वबाट टाढा रहन नसक्ने भन्दै बाढीपीडितको सहयोगका लागि रियल इस्टेट क्षेत्र एकजुट भएको जनाएको छ। व्यवसायसँगै सामाजिक उत्तरदायित्वलाई पनि प्राथमिकतामा राख्दै गरिएको यस सहयोगले विपद्को पीडामा रहेका परिवारहरूलाई केही राहत पुग्ने विश्वास लिइएको छ।
भोटेकोशी क्षेत्रमा आएको विनाशकारी बाढीका कारण प्रभावित भएका परिवारहरूले ठूलो पीडा र क्षति व्यहोर्नुपरेको अवस्थामा नेपाल जग्गा तथा आवास विकास महासंघले अघि सारेको सहयोग अभियानमा विभिन्न रियल इस्टेट व्यवसायी तथा सहयोगी मनहरूले उत्साहजनक सहभागिता जनाएका थिए।
महासंघका अध्यक्ष विष्णु प्रसाद घिमिरेको नेतृत्वमा सञ्चालन गरिएको सहयोग अभियानमार्फत संकलित रकमलाई सरकारको आधिकारिक विपद् राहत कोषमा जम्मा गरिएको हो। यसबाट सहयोग रकम पीडित परिवारहरूको आवश्यक राहत तथा पुनर्स्थापनामा प्रभावकारी रूपमा उपयोग हुने अपेक्षा गरिएको छ।
विपद्को यस कठिन घडीमा बाढीपीडित परिवारहरूको पीडामा साथ दिँदै सहयोग अभियानमा सहभागी हुने सम्पूर्ण रियल इस्टेट व्यवसायी, सहयोगदाता तथा सहयोगी मनहरूप्रति नेपाल जग्गा तथा आवास विकास महासंघले हार्दिक धन्यवाद तथा आभार व्यक्त गरेको छ।
महासंघले भविष्यमा पनि देशमा आइपर्ने प्राकृतिक विपद् तथा मानवीय संकटका समयमा सामाजिक उत्तरदायित्वलाई प्राथमिकतामा राख्दै पीडित नागरिकहरूको सहयोगमा निरन्तर सक्रिय रहने प्रतिबद्धता जनाएको छ।
भोटेकोशी बाढीले निम्त्याएको पीडामा रियल इस्टेट व्यवसायीहरूको यो सामूहिक साथ केवल आर्थिक सहयोग मात्र नभई विपद्को घडीमा ‘पीडितको साथमा सिंगो समाज छ’ भन्ने मानवीय सन्देशसमेत बनेको छ।
