योगेन्द्र योगी
सुन्दरहरैँचा(मोरङ):मोरङको सुन्दरहरैँचा–५ स्थित पूर्वाञ्चल पब्लिक स्कुलले बालबालिकाको प्रतिभा प्रस्फुटन तथा उनीहरूको आत्मविश्वास र सिर्जनशीलता विकास गर्ने उद्देश्यले बाल दिवसको अवसरमा नृत्य प्रतियोगिता आयोजना गरेको छ।
विद्यालय परिसरमा आयोजित Children’s Day Celebration Dance Competition अन्तर्गत विद्यार्थीहरूका लागि Junior Dance Competition (कक्षा २ देखि ५ सम्म) तथा Senior Dance Competition आयोजना गरिएको थियो।
प्रतियोगितामा विद्यार्थीहरूले विभिन्न सांस्कृतिक, आधुनिक तथा मनोरञ्जनात्मक नृत्य प्रस्तुत गर्दै आफ्नो कला र प्रतिभा प्रदर्शन गरेका थिए। आकर्षक पहिरन र उत्साहपूर्ण प्रस्तुतिसँगै विद्यार्थीहरूले मञ्चमा देखाएको प्रतिभाले कार्यक्रमलाई थप रोचक र मनोरञ्जनात्मक बनाएको थियो।
कार्यक्रममा बालबालिकाभित्र लुकेर रहेको प्रतिभालाई पहिचान गरी उजागर गर्नुका साथै उनीहरूको आत्मविश्वास, नेतृत्व क्षमता र सिर्जनशील सोचको विकास गर्ने उद्देश्य राखिएको विद्यालयले जनाएको छ। प्रतियोगितामा सहभागी विद्यार्थीहरूले आफ्नो उमेर र क्षमताअनुसार उत्कृष्ट प्रस्तुति दिएका थिए।
विद्यालयका प्रिन्सिपल सन्तोष राईले शैक्षिक ज्ञानसँगै विद्यार्थीहरूको सर्वाङ्गीण विकासका लागि अतिरिक्त क्रियाकलाप उत्तिकै महत्वपूर्ण हुने बताए। उनले नृत्य, संगीत, खेलकुद तथा अन्य सिर्जनात्मक कार्यक्रमले विद्यार्थीको आत्मविश्वास बढाउनुका साथै उनीहरूभित्र रहेको प्रतिभालाई बाहिर ल्याउन महत्वपूर्ण भूमिका खेल्ने धारणा राखे।
त्यस्तै, विद्यालयका अध्यक्ष मोहन ढकालले बालबालिकाको प्रतिभा पहिचान गरी उनीहरूको क्षमता विकासका लागि विद्यालयले निरन्तर यस्ता सिर्जनात्मक तथा प्रतिभामूलक कार्यक्रम सञ्चालन गर्दै आएको बताए। उनले विद्यार्थीलाई किताबी ज्ञानमा मात्र सीमित नराखी कला, संस्कृति र अन्य अतिरिक्त क्रियाकलापमा पनि सक्रिय बनाउनु आवश्यक रहेकोमा जोड दिए।
बाल दिवसको अवसरमा आयोजित जुनियर तथा सिनियर नृत्य प्रतियोगिताले विद्यालय परिसरलाई उत्साह, मनोरञ्जन र प्रतिभाको रंगले भरिदिएको थियो। विद्यार्थी, शिक्षक तथा अभिभावकहरूको उत्साहपूर्ण उपस्थितिमा सम्पन्न कार्यक्रमले बालबालिकालाई आफ्नो प्रतिभा मञ्चमा प्रस्तुत गर्ने महत्वपूर्ण अवसर प्रदान गरेको विद्यालयले जनाएको छ।
