योगेन्द्र योगी
सुन्दरहरैंचा(मोरङ : उज्ज्वल भविष्यको सपना बोकेर परिवारका लागि कमाउन विदेशी भूमिमा पुगेका दुई नेपाली युवाको यात्रा अन्ततः कफिनमा टुंगिएको छ। माल्टालाई कर्मथलो बनाएका राम कुमार सिजाली र तुलसीराम तामाङको पार्थिव शरीर नेपाल पठाइएको गैरआवासीय नेपाली संघ (एनआरएनए) माल्टाले जनाएको छ।
घरको कमजोर आर्थिक अवस्था सुधार्ने सपना, परिवारको मुस्कान फर्काउने चाहना र ऋणको भारी बोक्दै उनीहरू विदेशिएका थिए। तर नियतिले यस्तो क्रूर मोड दियो कि उनीहरू आफन्तको प्रतीक्षामा जीवित फर्किन सकेनन्। अहिले परिवारले आफ्ना प्रियजनको अनुहार हेर्न पाएको छ, तर त्यो अनुहार निस्प्राण कफिनभित्र बन्द छ।
सबैभन्दा पीडादायी पक्ष त यो छ कि, उनीहरूका सपना मात्रै अधुरा रहेनन्, उनीहरूले बोकेर गएका ऋणको भारी पनि अब परिवारकै काँधमा थपिएको छ। गाउँघरमा यतिबेला शोक छ, परिवारमा रुवाबासी छ, र भविष्यप्रतिको अन्योल अझ गाढा बनेको छ। एनआरएनए माल्टाले दुःखद घटनाप्रति गहिरो समवेदना व्यक्त गर्दै पार्थिव शरीर स्वदेश पठाउने सम्पूर्ण प्रक्रियामा सहयोग गर्ने सबैप्रति आभार प्रकट गरेको छ। संघका अनुसार कानुनी प्रक्रिया, समन्वय, व्यवस्थापन तथा आवश्यक सहयोगमा माल्टावासी नेपाली समुदायले उल्लेखनीय एकता र मानवीयता प्रदर्शन गरेको थियो।
यसैबीच, उहाँहरूको सहयोगार्थ सञ्चालन गरिएको ‘गो फण्ड’ अभियान आज मध्यरातदेखि औपचारिक रूपमा बन्द गरिने पनि जानकारी गराइएको छ। पार्थिव शरीर स्वदेश फर्काउन, कानुनी प्रक्रिया पूरा गर्न तथा परिवारलाई सहयोग पुर्याउने उद्देश्यले सञ्चालन गरिएको उक्त अभियानमा देश–विदेशबाट नेपाली समुदायले उल्लेखनीय साथ दिएका थिए।
“यो कठिन घडीमा साथ दिने सम्पूर्ण नेपाली दाजुभाइ तथा दिदीबहिनी तथा सम्बन्धित निकायप्रति हामी हार्दिक आभारी छौं। तपाईंहरूको सहयोग, सद्भाव र मानवीय भावनाले शोकमा डुबेका परिवारलाई ठूलो राहत पुगेको छ,” एनआरएनए माल्टाले जनाएको छ। विदेशमा श्रम बेचिरहेका हजारौं नेपाली युवाको वास्तविक कथा पनि यस्तै छ। धेरैजसो युवाहरू चर्को ब्याजमा ऋण लिएर विदेशी भूमिमा पुग्छन्। परिवारका सपना पूरा गर्ने संघर्षमा दिनरात खटिन्छन्।
तर कतिपयको भाग्य यति निर्दयी हुन्छ कि उनीहरू घर फर्कँदा हातमा कमाइ होइन, कफिन आउँछ। सिजाली र तामाङको निधनले यतिबेला माल्टावासी नेपाली समुदाय मात्र होइन, समग्र नेपाली समाजलाई भावुक बनाएको छ। सामाजिक सञ्जालमा श्रद्धाञ्जलीको लहर छ भने आफन्त र साथीभाइहरू अझै विश्वास गर्न सकिरहेका छैनन् कि हिजोसम्म बोलिरहेका आफ्ना मान्छे आज निस्प्राण भएर फर्किएका छन्।
विदेशको सपना धेरैका लागि अवसर बन्न सक्छ, तर केहीका लागि त्यो सपना कहिल्यै नफर्किने यात्रामा बदलिन्छ। स्वदेशमा रोजगारी र सम्मानजनक जीवनको अभावले हजारौं नेपाली युवालाई आज पनि जोखिमपूर्ण वैदेशिक यात्रामा धकेलिरहेको यथार्थ यी घटनाले फेरि उजागर गरेको छ।
