सुन्दरहरैंचा (मोरङ) : समाजमा मानवीय सेवा, धर्म संरक्षण र परोपकारी कार्यको उदाहरण प्रस्तुत गर्दै आएका सामाजिक व्यक्तित्व देबराज तामाङले मोरङको सुन्दरहरैंचा–५ स्थित नयाँ वृन्दावन गौशालालाई ट्रस (फलामे संरचना) सहयोग प्रदान गरेका छन्। गौशालामा बसोबास गर्ने तथा धार्मिक गतिविधिमा संलग्न ब्राह्मणहरूलाई सुरक्षित र सहज आश्रय उपलब्ध गराउने उद्देश्यले तामाङले उक्त सहयोग गरेका हुन्।
बुधबार आयोजित एक विशेष कार्यक्रमका बीच तामाङले गौशालालाई आवश्यक ट्रस हस्तान्तरण गरेका थिए। सहयोग हस्तान्तरण कार्यक्रममा गौशालासँग आबद्ध व्यक्तिहरू, स्थानीय समाजसेवी, धार्मिक अगुवा तथा श्रद्धालुहरूको उल्लेख्य उपस्थिति रहेको थियो।
कार्यक्रममा बोल्दै नयाँ वृन्दावन गौशालाका संरक्षक दीनबन्धु शास्त्रीले देबराज तामाङप्रति विशेष आभार व्यक्त गरे। उनले समाजमा अझै पनि धर्म, संस्कार र मानव सेवाका लागि निस्वार्थ भावनाले सहयोग गर्ने व्यक्तिहरू रहेकाले यस्ता धार्मिक संस्थाहरू सञ्चालन गर्न सहज भएको बताए।
“गौशालामा बसोबास गर्ने ब्राह्मणहरूका लागि सुरक्षित र व्यवस्थित स्थान निर्माण गर्ने हाम्रो प्रयासमा देबराज तामाङज्यूले महत्वपूर्ण सहयोग गर्नुभएको छ,” शास्त्रीले भने, “उहाँजस्ता सहयोगी मन भएका व्यक्तिहरूका कारण धार्मिक तथा सामाजिक कार्यहरूलाई निरन्तरता दिन थप हौसला मिलेको छ।”
उनका अनुसार गौशालामा दैनिक रूपमा गौसेवा, धार्मिक अनुष्ठान, पूजाआजा तथा विभिन्न आध्यात्मिक गतिविधिहरू सञ्चालन हुँदै आएका छन्। तर आवश्यक भौतिक संरचनाको अभावका कारण विभिन्न समस्या झेल्नुपरेको अवस्था थियो। तामाङले प्रदान गरेको ट्रसले आश्रयस्थल निर्माण तथा व्यवस्थापनमा ठूलो राहत पुग्ने विश्वास गरिएको छ।
सामाजिक व्यक्तित्व देबराज तामाङले समाजमा रहेका धार्मिक, सामाजिक तथा मानवीय क्षेत्रका आवश्यकताहरू पूरा गर्न सक्दो सहयोग गर्दै आएको बताउँदै गौसेवा र धर्म संरक्षण सबैको साझा दायित्व भएको धारणा व्यक्त गरे। उनले आफूले गरेको सहयोग कुनै प्रचारका लागि नभई समाज र धर्मप्रतिको उत्तरदायित्वबोधका कारण भएको बताए।
“गाई हाम्रो संस्कृति, सभ्यता र आस्थासँग जोडिएको विषय हो। गौसेवा र धर्म संरक्षणका लागि काम गरिरहेका संस्थालाई सहयोग गर्नु मेरो कर्तव्य हो,” तामाङले भने, “सहयोगको भावना जीवित रहँदा मात्र समाजमा सकारात्मक परिवर्तन सम्भव हुन्छ।”
स्थानीयवासीहरूले पनि तामाङको सहयोगलाई प्रशंसनीय कार्यको रूपमा लिँदै यस्ता सामाजिक व्यक्तित्वहरू समाजका प्रेरणाका स्रोत भएको बताएका छन्। पछिल्लो समय विभिन्न सामाजिक, शैक्षिक, धार्मिक तथा मानवीय गतिविधिमा सक्रिय रहँदै आएका तामाङले समुदायमा सहयोग र सद्भावको सन्देश फैलाउँदै आएका छन्।
धर्म, संस्कृति र मानव सेवाको संगम बनेको नयाँ वृन्दावन गौशालामा गरिएको यो सहयोगले केवल एउटा भौतिक संरचना निर्माणमा मात्र योगदान पुर्याएको छैन, बरु समाजमा सहयोग, सहकार्य र मानवताको भावना अझ मजबुत बनाउने काम गरेको स्थानीयहरूको विश्वास छ। यस्ता सत्कर्महरूले समाजलाई सकारात्मक दिशातर्फ अग्रसर गराउँदै जाने अपेक्षा गरिएको छ।
