सुन्दरहरैंचा(मोरङ) : मोरङको मिक्लाजुङ गाउँपालिका–५ को आर्थिक सहयोग तथा प्रगति महिला समाजको आयोजनामा सञ्चालित एक महिने ढाका कपडाको खादा बनाउने तालिम सम्पन्न भएको छ।
महिलाहरूलाई सीपमूलक तालिममार्फत स्वरोजगार र आयआर्जनसँग जोड्ने उद्देश्यले सञ्चालन गरिएको तालिममा सहभागीहरूले विभिन्न प्रकारका आकर्षक डिजाइनमा ढाका खादा बनाउन सिकेका छन्। तालिमका क्रममा परम्परागत तथा आधुनिक ढाँचाका खादा निर्माणसम्बन्धी व्यावहारिक ज्ञान प्रदान गरिएको थियो।
समापन कार्यक्रममा प्रगति महिला समाजकी अध्यक्ष पार्वती गच्छदारले महिलाहरूलाई आर्थिक रूपमा आत्मनिर्भर बनाउन यस्ता सीपमूलक कार्यक्रम प्रभावकारी हुने बताइन्। उनले तालिमबाट प्राप्त ज्ञान र सीपलाई व्यवहारमा उतार्दै व्यवसायिक रूपमा अगाडि बढ्न सहभागीहरूलाई आग्रह गरिन्।
वडा अध्यक्ष मेघनाथ तामाङले ढाका उत्पादनको बजार माग दिनप्रतिदिन बढ्दै गएको उल्लेख गर्दै स्थानीय महिलाहरूले उत्पादन गरेका सामग्रीलाई बजारसम्म पुर्याउन वडा कार्यालयले आवश्यक सहयोग गर्ने बताए। उनले सीप विकाससँगै उद्यमशीलताको विस्तारले स्थानीय अर्थतन्त्रमा सकारात्मक प्रभाव पार्ने विश्वास व्यक्त गरे।
वडा सचिव ख्यामनाथ दंगालले तालिमले महिलाहरूको क्षमता अभिवृद्धि मात्र नभई आर्थिक अवसर सिर्जना गर्न समेत महत्वपूर्ण भूमिका खेलेको बताए। उनले सिकेको सीपलाई निरन्तर अभ्यास गर्दै उत्पादनमूलक कार्यमा जोडिन सहभागीहरूलाई सुझाव दिए।
सहभागी सुष्मा राईले एक महिनाको तालिमबाट विभिन्न डिजाइनमा ढाका खादा बनाउन सिकेको बताउँदै यसलाई भविष्यमा व्यवसायका रूपमा अगाडि बढाउने योजना रहेको सुनाइन्।
तालिमकी प्रशिक्षक सुनिता तामाङले सहभागीहरूले निकै उत्साह र लगनशीलताका साथ तालिम पूरा गरेको बताइन्। गुणस्तरीय उत्पादन र नियमित अभ्यासमार्फत राम्रो आम्दानी गर्न सकिने उनको भनाइ थियो।
कार्यक्रममा वडा सदस्यहरू सूर्यप्रसाद ओझा, भीमचन्द्र लिम्बु र रिना दर्जी श्रेष्ठले समेत मन्तव्य व्यक्त गर्दै महिलाहरूको सीप विकास र आर्थिक सशक्तीकरणका लागि यस्ता तालिम आवश्यक रहेको बताए। उनीहरूले सिकेको सीपलाई व्यवहारमा उतारेर स्वरोजगार सिर्जना गर्न सहभागीहरूलाई प्रेरित गरे।
समापन कार्यक्रममा प्रशिक्षार्थीहरूलाई प्रमाणपत्र वितरण गर्नुका साथै तालिम अवधिमा तयार गरिएका ढाका खादा तथा अन्य सामग्रीहरूको प्रदर्शनीसमेत गरिएको थियो। आयोजकका अनुसार यस्ता कार्यक्रमले स्थानीय महिलाहरूको आत्मविश्वास वृद्धि गर्नुका साथै आयआर्जन र उद्यमशीलताको विकासमा महत्वपूर्ण योगदान पुर्याउने अपेक्षा गरिएको छ।
समापन कार्यक्रमका अवसरमा प्रशिक्षार्थीहरूले सिकेको सीपलाई निरन्तरता दिन सहज होस् भन्ने उद्देश्यले ढाका बुन्न प्रयोग हुने ५ थान तान (हाते तान) समेत हस्तान्तरण गरिएको आयोजकले जनाएको छ। यसले महिलाहरूलाई घरमै बसेर उत्पादन सुरु गर्न थप प्रेरणा मिल्ने विश्वास व्यक्त गरिएको छ।
