काठमाडौं — नेपाल तरुण दल केन्द्रीय कार्यालयले नेपाली कांग्रेसको नयाँ क्रियाशील सदस्यता वितरण अभियानलाई प्रभावकारी बनाउन देशभरका ७७ जिल्लाका लागि केन्द्रीय प्रतिनिधि तोकेको छ।
आइतबार जारी गरिएको प्रेस विज्ञप्तिमा नेपाली कांग्रेसले संगठनलाई अझ सुदृढ, गतिशील र समयानुकूल बनाउने उद्देश्यसहित देशव्यापी रूपमा नयाँ क्रियाशील सदस्यता अद्यावधिक तथा वितरण अभियान सञ्चालन गरिरहेको उल्लेख गरिएको छ।
विज्ञप्तिअनुसार उक्त अभियानलाई सफल, प्रभावकारी र परिणाममुखी बनाउन नेपाल तरुण दलको महत्वपूर्ण भूमिका रहने जनाउँदै प्रत्येक जिल्लाका लागि केन्द्रीय प्रतिनिधि खटाइएको हो।
कोशी प्रदेशअन्तर्गत सोलुखुम्बु, ओखलढुंगा, खोटाङ, भोजपुर, उदयपुर, संखुवासभा, धनकुटा, तेह्रथुम, पाँचथर, ताप्लेजुङ, इलाम र झापासहित अन्य जिल्लाका लागि पनि प्रतिनिधिहरूको जिम्मेवारी तोकिएको छ।
प्रेस विज्ञप्तिमा अभियानमार्फत पार्टी संगठनलाई थप सुदृढ बनाउँदै युवाहरूको सक्रिय सहभागिता बढाउने लक्ष्य रहेको उल्लेख गरिएको छ। साथै, तोकिएका केन्द्रीय प्रतिनिधिलाई सम्बन्धित जिल्लामा समन्वय, सहजीकरण तथा अभियानलाई प्रभावकारी रूपमा सञ्चालन गर्न निर्देशन दिइएको जनाइएको छ।
नेपाल तरुण दलले अभियानलाई सफल बनाउन सम्पूर्ण नेता–कार्यकर्ता तथा शुभेच्छुकलाई सक्रिय सहभागिताका लागि आग्रह गर्दै “जय नेपाल, जय तरुण” भन्ने नारासहित विज्ञप्ति सार्वजनिक गरेको छ।
