इटहरी/ मिसेस पूर्वेली आइकन तेश्रो संस्करणको पहिलो अडिसन इटहरीमा आइतबार सम्पन्न भएको छ । विवाहपछि महिलाका सपना र रहरहरू चुलोचौकोमै सीमित हुन्छन् भन्ने परम्परागत तथा रुढीवादी सोचलाई चिर्दै विवाहित महिलाहरूको प्रतिभा प्रस्फुटन गर्ने उद्देश्यसहित ओपन स्पेस प्रालिले हरेक वर्ष यो कार्यक्रमको आयोजना गर्दै आइरहेको छ । ‘मिसेस पूर्वेली आइकन’ टिमले महिला उद्यमशीलता र सशक्तीकरणलाई मुख्य प्राथमिकतामा राख्दै आइतबार अर्थात् असार २८ गते इटहरीमा यस प्रतियोगिताको पहिलो अडिसन सफलतापूर्वक सम्पन्न गरेको हो ।
इटहरीको संगीत चोकस्थित फूडसाला क्याफेमा सम्पन्न फिजिकल अडिसनमा १२ जना महिलाहरूले सहभागिता जनाएका थिए । आयोजकका अनुसार प्रतियोगिताका लागि ५० जना महिलाले अनलाइन फारम भरेका थिए, जसमध्ये डिजिटल अडिसनबाट उत्कृष्ट १२ जनालाई फिजिकल अडिसनका लागि छनौट गरिएको थियो । अडिसनको निर्णायकिय भूमिकामा कोरियोग्राफर सुभेच्छा कार्की, मिसेस पूर्वेली आइकन दोश्रो संस्करणकि विजेता मेघा खड्का, थर्ड रनरअप सिता पुरी, अर्गनाइजर च्वाइस अवार्ड विजेता रईशा चौधरी रहेका थिए ।
अघिल्ला दुई सिजनहरू इटहरीमा मात्र आयोजना हुँदै आएकोमा यसपटक प्रतियोगिताको दायरा अझ फराकिलो बनाइएको छ । कार्यक्रमका निर्देशक सरोज श्रेष्ठका अनुसार आगामी श्रावण ३ गते इटहरीकै फूडसाला क्याफेमा दोस्रो अडिसन हुनेछ भने त्यसपश्चात धरानमा पनि अडिसन आयोजना गर्ने तयारी भइरहेको छ । प्रतियोगितामा २० देखि ५० वर्ष उमेर समूहका विवाहित महिलाहरूले भाग लिन पाउनेछन् ।
यसपटकको सिजनलाई केवल बाहिरी आवरणको सौन्दर्य प्रतियोगितामा मात्र सीमित नराखी ‘महिला उद्यमशीलता र सशक्तीकरण’ को महत्त्वपूर्ण अभियानका रूपमा अघि बढाइएको आयोजकले जनाएको छ । इभेन्ट डाइरेक्टर सरोज श्रेष्ठले भने, “मिसेस पूर्वेली आइकन विवाहित महिलाहरूको क्षमता, आत्मविश्वास र पहिचानलाई उजागर गर्ने अभियान हो । हाम्रो विश्वास छ कि विवाहपछिको जीवन अन्त्य होइन, यो त नयाँ सम्भावनाको सुरुवात हो ।”
त्यसैगरी, आयोजक संस्थाकी सिईओ सजिना श्रेष्ठले सहभागीहरूलाई आत्मनिर्भर बन्न अभिप्रेरित गरिने बताइन् । उनले स्पष्ट पार्दै भनिन्, “फोटोसुट, भिडियोसुट र विविध प्रचारात्मक गतिविधिमार्फत महिला सशक्तीकरण, आत्मनिर्भरता र उद्यमशीलतालाई केन्द्रमा राख्दै, हामी प्रत्येक सहभागीलाई आफ्नो सपना अझ ठूलो बनाउने अवसर प्रदान गर्नेछौं ।” प्रतियोगितामा सहभागी महिलाहरूको प्रतिभा निखार्नका लागि कोरियोग्राफर सुभेच्छा कार्कीले विशेष प्रशिक्षण दिनेछिन् । यस प्रतियोगिताको शीर्ष उपाधि जित्ने विजेताले १ लाख रुपैयाँ बराबरको पुरस्कारका साथै अन्य विभिन्न आकर्षक उपहार र अवसरहरू प्राप्त गर्नेछन् । विवाहित महिलाहरूलाई आफ्नो लुकेको प्रतिभा देखाउने र समाजमा नयाँ पहिचान स्थापित गर्ने यो एक सुनौलो अवसर भएको आयोजकको दाबी छ ।
