विराटनगर |प्रदेश निजामती कर्मचारीहरूले प्रदेशमै उत्पादित ढाका, खाँडी र अल्लोका कपडाबाट निर्मित कार्यालय पोसाक लगाउन सुरु गरेका छन्।
प्रदेशको उत्पादनलाई प्रोत्साहन गर्ने उद्देश्यसहित कोशी प्रदेश सरकारले प्रदेशमै उत्पादित ढाका, खाँडी र अल्लोका कपडाबाट निर्मित कार्यालय पोसाक अनिवार्य रूपमा प्रयोग गर्न कर्मचारीहरूलाई निर्देशन दिएपछि सामाजिक विकास मन्त्रालयका कर्मचारीहरूले आजदेखि स्थानीय उत्पादनबाट बनेको पोसाक लगाउन थालेका हुन्।
मन्त्रालयका सूचना अधिकारी पेशल कुमार राईका अनुसार प्रदेश सरकारले बुधबार र शुक्रबार स्थानीय उत्पादनबाट बनेको कार्यालय पोसाक अनिवार्य रूपमा प्रयोग गर्ने व्यवस्था लागू गरेको हो। नयाँ आर्थिक वर्षदेखि प्रदेश सरकारको निर्णय कार्यान्वयनमा आएको उल्लेख गर्दै उनले अब बिस्तारै प्रदेशका अन्य सरकारी कार्यालयका कर्मचारीहरूले पनि उक्त पोसाक लगाउन सुरु गर्ने बताए।
प्रदेश सरकारले साताको दुई दिन स्थानीय उत्पादनको पोसाक लगाउनुपर्ने व्यवस्था गरेको छ। यसका लागि नियमित रूपमा प्रदान गरिँदै आएको पोसाक भत्तामा प्रतिव्यक्ति वार्षिक ५ हजार ५ सय रुपैयाँ थप गरी विशेष पोसाक सुविधा उपलब्ध गराइएको छ।
प्रदेश सरकारको यो व्यवस्थाले स्थानीय ढाका, खाँडी र अल्लो उद्योगको प्रवर्द्धन हुनुका साथै स्थानीय उत्पादनको प्रयोग बढ्ने मुख्यमन्त्री तथा मन्त्रिपरिषद्को कार्यालयले जनाएको छ ।
